الأربعاء، 21 مارس، 2012

بحبك يا امى






عندي كلام محبوس جوايا من 9 شهور و النهاردة حاسة اني خلاص محتاجة اقوله و عايزة اقوله و دلوقتي حقوله
انا عارفة ان كلامي حيوجع قلب ناس كتير





كلامي ده عنك يا أمي الحبيبة

انا بقول كلامي ده لأولادنا و لأحفادك اللي لسه ميعرفوش حاجة عن الدنيا و خدعها و غدرها
بقوله عشان يتعظوا و يعرفوا و يصلحوا من انفسهم قبل ما يندموا حين لا ينفع الندم

الي أمي الحبيبة الغالية

اشكرك و سامحيني يا أمي علي كل يوم سهرتك فيه الليالي و انا عيانة و انت قاعدة خايفة عليا و تمرضيني و تمسحي دموعي

• اشكرك و سامحيني يا أمي علي كل يوم روحتي أشتريت فيه عيش من الفرن من صباحية ربنا و توقفي بالتلات ساعات و انا نايمة في البيت و متدفية

• اشكرك و سامحيني يا أمي علي كل يوم روحتي أشتريت فيه السوق تشتري أكل الاسبوع و تشيليه علي قلبك لوحدك و انا قاعدة في البيت بتفرج علي التلفزيون

• اشكرك و سامحيني يا أمي علي كل يوم غسلت فيه المواعين لاسرة من ثمان افراد لمدة ساعة كاملة و انا قاعدة بحللي فاكهة بعد الأكل

• اشكرك و سامحيني يا أمي علي كل يوم كنستي فيه أرض الشقة كلها و انت عندك حاجة و خمسين سنة و ظهرك يوجعك و انا قاعدة علي السرير و مددة

• اشكرك و سامحيني يا أمي علي كل يوم غسلت فيه غسيل ثمان أفراد بالغسالة اليدوي و كمان كنت تشطفيه تنشريه و انا قاعدة بحجة اني مبحبش أتبل و أن المياه ساقعة عليا

• اشكرك و سامحيني يا أمي علي كل يوم قولتيلي فيه أعملي الشئ الفلاني و أنا نسيت او تناسيت و سيبتك أنت تعمليه

• اشكرك و سامحيني يا أمي علي كل يوم كنت بتديني فيه فلوس من مصروفك الشخصي علشان أشتري اللي نفسي فيه و تحرمي نفسك من اللي نفسك انت فيه

• اشكرك و سامحيني يا أمي علي كل يوم وقفت فيه في المطبخ بالساعات تعملي أكل لخطيبي و عائلته لما بيجوا زيارة و أنا قاعدة قدام المراية بتزوق

• اشكرك و سامحيني يا أمي علي كل يوم زعلتك فيه و أنا و لا هاممني و برضوا بتصلحيني و متقدريش تستحملي زعلي

• اشكرك و سامحيني يا أمي علي كل يوم جيت اشتكيت لك فيه همي و انت تشيلي همي و متنميش الليل من قلقك عليا

• اشكرك و سامحيني يا أمي علي كل يوم مشترتيش فيه حاجة لنفسك و تديني أنا الفلوس اشتري بيها هدوم اتشيك بيها و انا راحه دروسى ومدرستى

• اشكرك و سامحيني يا أمي علي كل يوم كنت بحتاج فيه فلوس و انت بتسلفيني و يوم ما مرضت للاسف فلوس الدنيا مقدرتش تخفف عنك ألمك و عذابك


• سامحيني يا أمي علي كل يوم مكنتش بخدمك فيه و انت مريضة زي ما اخواتي الكبار عملوا لانهم كانوا معاكي في نفس البيت

• ارجوكي سامحيني يا امي علشان ملحقتش ابوس رجليكي و ايديكي و اقولك حشيل فضلك عليا لاخر العمر لانك اتوفيتي قبل ما اشوفك واودعك ودى اصعب حاجه وجعانى

عارفه كمان يا امى انا دلوقنى مخنوقه اوى اوى لان نفسى اشوفك واضمك تعبانه اوى يا امى من الا بيحصلى الايام دى
مفتقداكى اوى اوى يارب ارحمنى يارب

وحشتيني يا أمي و نفسي أشوفك
بس عارفة أنا بشوفك كل يوم لانك زرعت بذرة منك في كل واحد فينا

 بشوفك في عين أختي (1) لما بحتاج نصيحة أو سؤال بجري عليها و أسألها و هي تضمني و تطمني و تنصحني
 بشوفك في عين أختي (2) لما أكون متضايقة و مخنوقة و عايزة أفضفض مع حد بجري عليها و أرمي همومي
 بشوفك في عين خالتى (3) في طيبتها و حنيتها و ضحكتها اللي بتملأ الدنيا بيها لما بروح عندها البيت و تشيلني من علي الارض شيل
 بشوفك في عين خالتى(4) لما باجي و اشوفك في عينيها و أشم ريحتك في هدومها و أمسك أيديها اللي كنت دايما بتسنديها بيها و هي ماشية
 بشوفك في عين خالتى(5) في قوة تحملها و صبرها و حبها المتفاني لأسرتها و بشوفك في ملامح وجهها بحس أني قاعدة معاكي و انت صغيرة


بس عارفة يا أمي انا فرحانة لاني حاسة ان ربنا بيحبك و بيحبنا أوي أوي
عارفة ليه؟
لانك ربتينا تربيه نفتكرك بيها
 

ابويا حبيبى
• شكرا يا ابويا  على كل شعرة شابت من رأسك وأنت بتشيل همي.
• شكرا يا ابويا على كل قطرة عرق سالت على جبينك وأنت بتتعب و تشتغل علشان توفر لي احسن عيشه.
• شكرا يا ابويا على كل لقمة عيش او أكلة حلوة شقيت و تعبت علشان تضعها في فمي..
• شكرا يا ابويا علي الاف الفلوس اللي دفعتها لتعليمي علشان اكون محترمة وذات تعليم
• شكرا يا ابويا علي الاف الفلوس اللي دفعتها لي في زواجي علشان تشرفني أمام عائلة زوجي
• شكرا يا ابويا على المصروف اليومي اللي كنت بتتعب علشان تجيبه و تدهولي و انا اروح اشتري بيه حلويات
• شكرا يا ابويا علي سفرك و غربتك و بهدلتك بره علشان توفر لنا عيشه كريمه و حياة مريحة هنا




و كمان يا أمي ربنا أعطاني زوج بيراعي ربنا فيا كتير
وبيخاف عليا وبيعمل الا يقدر عليه واكتر علشان يسعدنى حتى ولو فوق طاقته بيحاول يرضينى ويعوضنى حنانك
ربنا يخليه ليا وميحرمنيش منه ابدا ابدا وياخد من عمرى ويعطيه يارب اللهم امين
و أخيرا يا أمي و ليس آخرا أحب أقولك كلمتين

انت وحشتيني أوي
فعلا وحشتيني أوي
بجد وحشتيني أوي أوي أوي

و أحنا جايبين لك النهاردة معانا أحلي هدية
كلنا سنقرأ الفاتحة علي روحك
داعين الله ان يرحمك و يغفر لك ذنوبك و يسامحك و يدخلك جناته من أوسع ابوابها أن شاء الله

الفااااااااااااااتحة
بسم الله الرحمن الرحيم
الحمد لله رب العالمين – الرحمن الرحيم – مالك يوم الدين – إياك نعبد و إياك نستعين – إهدنا الصراط المستقيم
- صراط اللذين أنعمت عليهم غير المغضوب عليهم و لا الضالين – آمين – صدق الله العظيم

بحبك يا أمي