الثلاثاء، 20 سبتمبر 2011

اخر اخبارى



انا مكنتش عاوزه اكتب البوست دا
بس فى كذا حد وانا بعلق عندهم عاوزين يعرفوا اخبارn فى الفتره الا فاتت
وانا بصراحه  عملت مدونه جديده علشان ما افتكرشى اى حاجه من الماضى
بس قررت انى اتكلم ولو على جزء بسيط منه لان كان حبيبى فيه
انا اخر بوست كنت كتباه فى مدونتى القديمه انى خلاص هتجوز وكنت بكتب البوست دا
ومكنتش شيفا من كتر العياط وانتم فاكرين السبب
ووفكرين كتر محاولاتى فى انى انفصل بس مقدرتش
وسبحان الله قبل فرحى باسبوعين حصل الانفصال
من عند ربنا
من بعدها اعصابى تعبت رغم انى كنت فرحانه جدااااااااااا
بس اعصابى كانت تعبانه اووى
ومش طيقا حتى نفسى الا طالع منى
اتقدملى بعدها على طول ناس
كنت خايفه من رد فعل اخواتى عليا فى رفضى لرابع مره
لعند ما كنت خلاص كرهت الحكايه دى
كنت انام واخاف من بكره لحد يكلمنى
مش هتكلم كتير انا هختصر وبس
بس كان الحد الوحيد الا بخاف انه يزعل منى هيا
امى الله يرحمها يااارب
كانت تنام وتحلم بيوم فرحى
كانت لما تروح اى فرح ترجع وكل حزن العالم على وشها
وتبصلى وتتخيل انى انا كنت العروسه
حسا بيها وعلى الكلام الا فى عنيها بس كنت بستعبط واعمل نفسى مش واخده بالى
لعند ما اتقدملى واحد
لقيت الكل موافق عليه
الكل ايه
دا هيا امى الله يرحمها
واخواتى
بس اخويا الكبير كان اكتر  والا كان بيخنقنى جدااا انه ميعرفوش بس موافق عليه من كلام الناس عليه وعلى احترامه وادبه
ولقيت امى الله يرحمها تعرف والدته
وكل يوم كانوا يتكلموا  معايا فى الموضوع دا وانا رافضه
حرام والله كل دا على اعصابى
4  مرات خطوبه وانفصال وبرضو مش حسين بيا
نفسى ارضيهم وارضى نفسى
لقيت الكل متحاذ لشخص واحد معين بالرغم ان كان فى اتنين وقتها معاه متقدمين
رغم انى كنت رفضا نهائى الارتباط وقتها او حتى الكلام فيه بس كان جوايا شبه فضول
اشمعنا داا
وفى يوم بالليل لقيت امى بتبكى الله يرحمها
وسئلتها لقيت كلامها كل حزن وياس ونفسها تفرح بيا وقلتلى حسا ان  عمرى بينتهى
وانتى الا هتتظلمى فى البيت دا
 فكرت فى امى وفى انى افرحها حتى لو هاجى على نفسى وحياتى
وكان الحد الا الكل موافق عليه كان دايما كل يوم ويتصل ويسئل لانه مكنشى فى مصر
وهوا صاحب اخويا
فا قلت للبيت الا انتم شيفينوا انا هوافق عليه وكان قلبى كله حزن
اخويا كلمنى وقلى احنا مش هنغصب عليكى بس شوفيه وكلميه على النت
فا قلت لنفسى ما ارفضشى حد من غير ما اعرفه
ودى هتبقا اخر فرصه هديها لنفسى ولحياتى
اخويا قلى  هوا هيكلمك بعد ربع ساعه
كان نفسى وقتها الساعه تقف وماتمشيش تانى ابدا الا  تانى يوم المهم الحد دا رن وقلبى وقتها وقف والكولون بقا اشتغل واعصاب رجلى بتترعش
اكنى هكلمل ملك الموت
واول ما اخويا قلى خد التيلفون اهو هيكلمك
صوتى اتنبح وما تنطقتش الا كلمه الو سلاموا عليكم
وهوا نازل لوك لوك لوك بس بكل ادب واحترام
 وكل الا كنت حساه قبل المكالمه اتغير نهائى فى وسط المكالمه
ماتقلوش لزقت فى التيلفون
ووقتها حبيت يتكلم اكتر بالرغم انى مكنتش برد عليه نهائى
بس اتخلق جوايا راحه كبيره اووى ليه واتمنين يكلمنى لتانى يوم
فا لقيت  اخويا سئلنى ايه ولا نطقت
بس الحد دا طلب منى انى اشوفه  الاول قبل اى كلام هيتقال
علشان ما يظلمنيش
ويوم ما شفته على النت
كسوفه العالم كله اتحط على وشى ومن وقتها حسيت براحه اكتر واكتر ومن اخواته
وكلمت امى الله يرحمها  وقلتلها موافقه بس الرد وصل متاخر للحد دا
وكان كل يوم يتصل على التيلفون الارض وقلبى كان يقلى ان هوا الا بيرن
بالرغم انى مكنتش اعرف شكل التيلفون اصلا  ولا عمرى رديت عليه خالص
بس من ساعه ما كلمنى وبقيت ملهوفه انى ارد
ومن قبل ما يرن كنت بجرى على التيلفون
والله كنت بنام جمبه وكنت بموت من البرد
احساس بجد غريب
ومش عارفه انهى جراءه جتبله انه يتصل اصلا
من غير ما مايسمع الرد
مش عارفه والله
وكنت بحب اسمع صوته جداااااااا
وهوا اكتر
بسبب من غير سبب كان يتصل
كل دا من قبل ما يعرف الرد
شى غريب شده ليا وانا كامثل سبحان الله يارب
وفضلنا  فى حدود 15 يوم كده ولما عرفوا الرد انى موافقه حصل عندهم حاله وفاه
اه فقريه)
)
فى مانع
المهم بعدها برضو باسبوع لبست دبلته
وكانت الدبله الوحيده الا كنت فرحانه بيها
لو كان اليوم اتخلق فيها اكتر من 24 ساعه كنا برضو اتكلمنا فيهم
وحبيته اوووووووى
وخلاص الحب دخل من غير ما يخبط

حب لحد الجنون
هز فيا مشاعر محستهاش ابدا فى حياتى ابدااااا
كانت خطوبتى يوم 7\3\2011
وكان جوازى متحدد اول 7 على ما ينزل وكده
وخلاص  بدانا نحلم بحاتنا
وكل يوم كنت بدعى ربنا على نعمته الا اهدهالى بعد كل داااااااااااا
وبحمد ربنا على انه ادانى الفرصه انى اكلمه ويحصل ارتباط لااول مره حسيته بيه بجد
صابر لقيت فيه كل حاجه حلوه
حنيته
طيبته
شخصيته الا عجبانى جدااااااااااا
متسامح جدا جدا
اسلوبه مع الناس كلها بيشدنى اكتر ليه
احترام للصغير قبل الكبير
رجولته فى كل حاجه حتى الهزار
كنت رخمه جدا الاول
وكان مستحملنى وكان بيصبر عليا كتير
كنت بحب اتغير علشانه اوووى اطبع على طبعه هوا
كانت امى الله يرحمها كل يوم تحط ايدها على راسى وتستغرب ان انا بنتها بالسعاده دى كلها
وعمرى ما يجيلى نوم ابدا
الا لما اشوف حبيبى  واسمع نفسه كمان وهوا نايم
كان بيجى على نفسه كتير جدااااااا وبيسهر معايا كل يوم وبيكون راجع من شغله خلاص مش شايف من التعب
ومجرد ما نتكلم الاقى براءه العالم كله وسعاده الكون فى نبرات صوته
بحبك اوووووووووووووووووى يا ابن قلبى
والامل دخل قلبى من جديد




وعدت ايام واسابيع وشهور وحصل مشاكل فى البيت
وامى تعبت الله يرحمها
وكان كل ساعه حبيبى يكلمنى ويكون معايا يطمئن
ويوم 4\5\2011
امى اتوفت
ومش هتكلم وقتها كان ايه احساسى وحياتى
بس بعترف لتانى مره ليك يا حبيبى
لولى انت كنت فى حياتى الفتره دى
كنت مت بعد امى الله يرحمها على طول
لان امى دى كانت قبل منك حياتى كلها وكنت فى كل مره ارتبط فيها كنت برطب علشان افرحها
وقبل ما تموت بساعات
وهيا كانت شبه ميتها فى العنايه المركزه
قلتلى جايا ليه روحى لصابر روحى
وقبلها بيوم قلتلى اطمنى هتتجوزى فى ميعادك ووصت خالتى واخواتى جوزوها
وماتت امى

ياااااااااااااااااااااااااااااااااه على الدنيا
كان نفسى افرحها بيا
كان نفسى احققلها حلمها فيا
بفستانى الابيض
كان نفسى اخر حضن اخده من بيتها كان نفسى يكون حضنها هيا
كان نفسى ونفسى ونفسى ونفسى
بس الله رحمك من عذاب الدنيا
بحبك اوووى
ومفتقداكى جدا يا امى
عيشتى معايا 18 سنه وكان نفسى تعيشى معايا قدهم
تشوفى فرحتى بحبيبى وجوزى
وتربى اولادى
وافكرك انى بقيت ام زيك
ياااااااه الدنيا مش بتدى للانسان كل حاجه
كل ما اشوف حماتى تعمل حاجه كانت امى تعملها
بتعب بعدها وببكى وامى تجيلى وتكون حسا بيا وتطبط عليا
فى مره مره ببكى فيها من حاجه مزعلانى دايما حسا بيا وتيجى لااختى وتوصيها عليا
وهيا طمنتنى ان ربنا هيرزقنى ان شاء الله
وعدت ايام واخواتى اتكلمو
انا هعيش ازاى
ابويا ومتوفى
وامى واتفت الله يرحمهم
واختى متجوزه وبعيده جدا عنى
اخواتى متجوزين
طب ودى هتعيش ازاى لوحدها
اتفقوا كلهم اخواتى وخالاتى واخوالى انهم يجوزنى فى ميعادى
وحبيبى قلى
فرحتى انتى وممكن ناجل سنه وحتى لو اجلنا سنه برضو مافيش اى فرح ولا اى حاجه هنعملها
وفكرى
انا لسه ما شفتكيش على الحقيقه
كل شوفتى ليك كام وبس
لما اجى هشوفك ازاى عمرى ما ادخل بيتك ومافيش راجل فيه
فا كلام ورى كلام
وتمت الموافقه انى اتجوز فى ميعادى



وحبيبى جه قبل الفرح بى 4 ايام
ولاول مره اشوفه
كان نفسى اترمى فى حضنه اوووى
وابكى
وكل ما ابصله اقله بحس انى كنت مستكتراه اوى عليا
ويوم كتب كتابى مكنتش مصدقه ان النحس خلاص اتفك
وبقيت مدام
ومدام  لمين كمان
الا اتمنيت انى  اكمل معاه
وكان نفسى اقول لبيتنا بس وجيرانا
واخيرا اتجوزت ومحدش ليه عندى حاجه
واييييييييييييييييييييييه
ويوم ما كنت بلبس فستانى بركان دموع كان جوايا محبوس
واتخيلت امى معايا
بتلبسنى هيا فستانى
وطبعا اتفقنا ان مافيش اى فرح
ولا هيصه
ولا عملنا اى حاجه
فرشت شقتى عادى
وحنتى كانت برضو عادى
كل الا كان قاعد كان لابس اسود
حتى يوم فرحى
سبونى اقول فرحى
بس بجد بالرغم ان ماكنشى فى اى حاجه وكنت اصلا من اول خطوبتى كنت بحلم بفرح كبير ليا
وجوزى برضو كان نفسه
بس قدر ومكتوب لينا
والحمد لله يارب
واتجوزنا ودى كانت اول فرحه تدخل قلبى من بعد وفاه امى الله يرحمها
وبالرغم ان امى ماتت
بس جيت البيت دا لقيت ام ليا بجد
معنتش قادره اكتب
ومن نص رمضان كده الا فات فكرت ارجع تانى لعالم التدوين قلت اهو اعبر فيه عن احساسى واكتب كل الا عاوزه اقوله
لان من بعد حبيبى ما سافر حياتى ملل وفراغ
وبس
وادينى اهو معاكم واحسن من الاول كمان
والحمد لله
ــــــــــــــــــــــــــــــــــــــــ
اخر كلامى
الله يرحمك يا امى
الله يرحمك يا ابويا
ــــــــــــــــــــــــــــــــــــــــــــــــــــــــــــ
بحبك اووووى يا صابر

هناك 28 تعليقًا:

شاب فقرى يقول...

الف مبروك
ربنا يديم سعادتك وفرحتك
والحمد لله إن ربنا عوضك عن صبرك كل خير
ويارب يارب يارب يارب يارب يجمعك بحبيبك فى بيت واحد ويرجعلك من تانى او تسافرى له
ربنا يرضى عليكى ويفرح قلبك
وربنا يتقبل والدتك فى جنته ويغفر لها يارب ويرحمها ويبارك لها فيكى يارب
مش عارف اقول ايه كالعادة
ربنا يفرحك اكتر
واحزانك تبقى مجرد ذكرى تفكرك بالناس اللى حبيبيتيهم بجد وكانوا بيحبوكى وبيتمنوا لك كل خير ويفكرك بوالدتك دايما وتبتسمى وتفرحى لان هى فرحت بيكى فى يوم قبل ما ربنا يتوافاها
ربنا يرضى عنك ويكبر لك فرحتك ويرزقك بالذرية الصالحة يارب
أنا فرحان لك :) :) :)
جدا جدا جدا
ربنا يرضى عليكى ويديم فرحتك ويخلي لك جوزك ويرضى عنكم دايما يارب
كريم

بنت قلبى يقول...

شاب

مش هعرف اقول فقكرى
بس ممكن اقول شاب متفائل الى حد ما يعنى
اولا الله يبارك فيك يارب
الهم امين يا رب
اللهم امين يارب
اللهم امين يارب
الله على الدعوات بحب اى حد بيدعيلى اوووى
ويارب تبقا اخر الاحزان
ليا ولاامه محمد كلها يااارب
ومعليش لو مكنتش اخدت بالى فى ردك على التعليق عندك قبل كده

انا فكرت ان فى زعل ولا حاجه
بس الحمد لله انه مافيش

Miss LoZa يقول...

اولا الله يرحم مامتك ويدخلها فسيح جناته ان شاء الله :)
ثانيا ربنا يخليكو لبعض انتى وجوزك ويرجعلك بالسلامة بقه
ثالثا عقبال ما النحس بتاعى انا كمان يتفك لحسن زهقت خالص
هههههههههههههههههه

الاحلام يقول...

والله اختى الحياه كلها تناقضات غريبه ما بين الفرح والجزن ما بين السعاده والدموع
ولولا حب من نحبهم كنا انتهينا جميعا فالحب الشىء الوحيد الذى يعوض الحزن والبكاء نسال الله عز وجل ان يعود صابر بسلام وان تعيشوا فى هدوء وسعاده وتنعمى بحياتك كلها دمتى بخير اختى العزيزه
اخر كلامى الله يرحم ابيكى الله يرحم امك
تحياتى الاحـــــــــــلام

فشكووول يقول...

السلام عليكم
تحياتى
والله ماانا عارف اقول لك البقاء لله فى والدتك ولا اقول الف مبروك على الزواج خلينا فى الحاضر ونقول الف مبروك على الزواج والحمد لله انك لقيتى ام تانيه وعلى فكره صابر .. صبر كتير عليكى وربنا كافأه بيكى اخيرا وكافأه بيه
تحياتى والف مبروك ... يا صااااااابر

فشكووول يقول...

خدى بالك بقى انك بتكتبى تقريبا بوست يوم بعد يوم .. خفى شويه عشان ما يضيعش بوست من غير الواحد ما يقراه .. يعنى كفايه كل اسبوع بوست

ريري كربكه يقول...

حسيت بيكي اوي يا بنت قلبي وعند كل حدث ليكي كان فيه حزن انا بكيت معاكي
وكل حدث قولتيه فيه فرح انا فرحت معاكي
ربنا يوفقك مع زوجك ويرجعهولك بالف سلامه
والله يرحم والدتك اكيد هي مبسوطه علشان اطمنت عليكي
وثقي ان معكي اللي احن من الكل اللي اقرب لينا من حبل الوريد
وهوالله عز وجل اذكريه دائما
الا بذكر الله تطمئن القلوب
تقبلي مروري
وشكرا لكي

beautiful mind يقول...

اولا ربنا يرحم والدتك رحمه واسعه
ويسكنها فسيح جناته
والحمد لله رب العالمين ان ربنا عوضك خير بالزوج الصالح اللي عوضك حنان الام
وقد ايه انا سعيد وفرحان اني بقرا كلام عن الحب للدرجة دي
بس لي عندك رجاء من اخ اكبر منك بلاش تسردي تفاصيل لحياتك شخصية للدرجة دي يمكن انتي قولتيها بنية طيبه بس الكلام دا مينفعش هنا مش كل صوابعك زي بعضها
تقبلي نحياتي
وكل سنه وانتي طيبه

بنت قلبى يقول...

الاحلام
اللهم امين يارب
ويرحم اموات المسلمين
وصح كلام حضرتك
ومتشكره جدا لتواجد فى مدونتى دايما
وعلى تعليقات حضرتك

د.ريان يقول...

صباح العطر بنت قلبي

وربنا يرحم الوالدة الطيبة

ويدخلها الجنة ويجعل حياتكِ

سعادة دائمة ويعوضكِ خير

ويارب يجمعكِ مع حبيبكِ ومايكون

بينكم لا سفر ولابعد وتكوني

حبيبة قلبه الوحيدة وطول العمر

وفرحنالكِ جدا ويارب كل أخباركِ

أفراح وسعادة

دمتم بخير

بنت قلبى يقول...

ميسس لروزه
الله يفرحك يا حبيبتى يارب وزى ما فكوا منى يفكوا عنك
لانه رخم وغلس داااااااااااااااا
واللهم امين يارب على دعواتك

بنت قلبى يقول...

ميسس لروزه
الله يفرحك يا حبيبتى يارب وزى ما فكوا منى يفكوا عنك
لانه رخم وغلس داااااااااااااااا
واللهم امين يارب على دعواتك

بنت قلبى يقول...

استاذى فشكووول

ايوه خلينا فى المستقبل لانى بنهى كل الا كان فى الماضى
لان الا فى المستقبل عندى غنينى بحياتى كلها
ومن نحيه صابر حبيبى فا هوا اسم على مسمى بصراحه
والحمد لله يارب العالمين
وياااااااااااااااااااارب يسمع منك يا استاذى يارب
وتسلملى على تعليقاتك الجميله

بنت قلبى يقول...

حاضر استاذى
علم وسينفذ باذن الله

بنت قلبى يقول...

beautiful mind

يبقا مكنتش عملت مدونه بقااا
انا بقالى 3 سنين فى العالم التدوين وبحكى كل حاجه خنقانى او عاوزه احكيها
وعمرى ما شفت اى رد بينتقدنى او حد منعنى
وممكن يكون كلام خوف بس وضحلى من ايه
وازاى يعنى صوابعنا مش زى بعضها يعنى ايه الا ممكن يحصل
ــــــــــــــــــــــــــــــــ
على العموم اهلا وسهلا بيك فى مدونتى

بنت قلبى يقول...

د. ريان

اللهم امين يارب اجمعين
ومتشكرا لمتابعتك فى كل بوست وتعليقاتك عليها ومتابعتك برضو للتعليقات

Unknown يقول...

بنت قلبي

برغم المراوحة بين الالم و الامل الذي جاءت

به تدوينتك الاّ انني لمست في حروفك

روح صدقك و جمالية روحك ...

هي الدنيا يا صديقتي تحملنا في كثير من المتناقضات لكن ثقي ان رحمة الله واسعة
و مع العسر يسرا ...

منجي


مدونة الزمن الجميل يسعدها دعوتك إلى جديدها !


~

غير معرف يقول...

صباحك غاردينيا بنت قلبي
ورحم الله والدتك وأسكنها فسيح جناته سعدت جداً بـ أخبار زواجك وحبك الذي وصل أخيراً ويارب يجعل أيامك أنتي وصابر حب وسعادة ومهما بعد وسافر حيفضل جواكي تصونيه في غيابه وحضوره وتشتاقي لكل لحظة عشتوها سوا"
؛؛
؛
بنوتة
انتي قلتي في مدونتي سمعتي عني كتير
تعال قوليلي سمعتي ايه هههههههه
بهزر معاكي وسعيدة بيكي جداً بحس الي في قلبك على لسانك ممكن تتقبليني صاحبه ليكي حكون هنا دايما :) "
؛؛
؛
لروحك عبق الغاردينيا
كانت هنا
reemaas

نيللي علي يقول...

سعيده بزيارتى لمدونتك

كلام دبح قلبى ..وبكيت ..بس فرحت ان ربنا رزقك بالزوج الصالح

ومش هقدر اقولك غير "ربنا يسعدك ويرزقك يارب بالخلف الصالح" اهو الفجر بيأذن ربنا يستجيب منى

"نيللى"

بنت قلبى يقول...

منجى باكير

اهلا وسهلا بحضرتك
الحمد لله يارب

بنت قلبى يقول...

ريماس

اهلا اهلا باول زياره ليكى فى مدونتى
واللهم امين يارب لدعواتك
ولا مش هقلك بما انه هزار بقا
بس والله الحقيقه
مش انى بسمع عنك حاجه لاء
بشوفك عند ناس وبيكون اغلبهم مستنى ردودك وهكذاا
وبس ومش هكمل بقااا
اصل انا رخمه على فكره
وحبا دلوقت ارخم بصراحه
تسميلى يارب لدعواتك ولكلامك ليا

بنت قلبى يقول...

نيللى

اولا كده اهلا بيكى لاول مره فى مدونتى
ثانيا بقا ودا الاهم
ماتبكيش تانى ابدا
ويارب تفضل حياتهكم كلها سعاده يااارب
ونورتنى يا قمر

الاحلام يقول...

تواجدك فى مدونتى يعطى بهجه وسرور لها فلا تحرميها من تواجدك تحياتى الاحــــلام

saber kazamel يقول...

حبيبة قلبي وروح قلبي وبنت قلبي بحبك اوى مش لاقى كلام اقوله لان اللى جوايا اكبر من الكلام اقل حاجه ممكن اعبر عن شعورى بيها انى فخور جدا بيكى وبحبك جدا جدا جدا .....وكمان احب اشكر كل الاخوة والاخوات اللى علقوا على البوست ده وكمان على اى بوست كتبتيه من قبل بشكركم جميعا على مروركم الجميل والمحترم وكمان على النقد البناء اللى بتقدموه لينا فى تعليقاتكم الجميلة بشكركم جدا وبتمنا من الله عز وجل ان يهدينا جميعا الى الصراط المستقيم وان يجمعنا على خير ان شاء الله
واخيرا بحبك يا بنت قلبي
وخير الكلام استودعكم الله فى رعاية الله وامنه
تحياتي الزوج العاشق
صابـــــــــــــــر

saber kazamel يقول...

بنت قلبي وحشتينى جدا والحياة وحشة اوى وانتى مش معايا اتمنا من ربنا انه يجمعنا قريبا وعلى خير ان شاء الله لان الحياة صعبة جدا وانتى بعيدة عنى
بحبك جداااااااااااااااااااا
الزوج العاشق
صابــــــــر

بنت قلبى يقول...

((((صابر قزامل))

ابن قلبى وحبيبى قلبى ونور عنيا حبيبى اناااااا

اولا بشكر ربي كتير لانو وهبني زوجي

وبقول لية الله يخليك لي انا بحبك كتير

ومتشكرة لوقفتك معاي لما كنت في اشد

الحوجة ليك وشكرا لحبك وطيبة قلبك

وحنيتك لي

شكـــــراً لك حبيبي

لأني بوجودك أحببت الحياة

بوجودك شعرت بأن الحب سيدٌ عذبٌ وراق

عرفت أن القلب يظمأ ويرتوي

يفرح لرؤيتك ويتألم لفراقك

بوجودك أصبحت أراك في كل الوجوه فأبتسم

أحس أن الدنيا تفرح من أجلي

عشقي:

لا اعرف كيف اصيغ عباراتي

ولا حتى كيف أسكب عبراتي

تركت المجال لفرشاة أقلامي

ولقلبي
ربنا مايحرمنى منك ابدا ابدا ابدا

يارب العالمين

rona ali يقول...

اول مرة اجى هنا بس واضح انها مش هتكون اخر مرة

ولو انى حاسه ان طريقه تدوينك
في الكام البوست اللي قبل دة كإن الطفل اللي جوايا بيتكلم وبيتجسد في الكلام دة

وحاسه كمان انى هنا هعيط بسببك كتير اوى :(:(

الجزء بتاع كلامك عن مامتك وجعنى اوى اوى اوى ربنا يرحمها ويسكنها فسيح جناته يارب هى ووالدك

وربنا يفرج همك ويشرح صدرك ويفرج كربك وينور طريقك ويرجعلك حبيبك بالسلامه يارب

عجبنى هنا واكيد هرجع تانى :):)

ويكا يقول...

:))

ربما يباركلكم فى بعض